Ақтөбе облысының тұрғындары мемлекеттен 3,5 млн теңгені заңсыз алып келген - «Qazaqstan» Ұлттық телеарнасы

Ақтөбе облысының тұрғындары мемлекеттен 3,5 млн теңгені заңсыз алып келген

04.09.2019
Ақтөбе облысының тұрғындары мемлекеттен 3,5 млн теңгені заңсыз алып келген

Өздерінің нақты табыстарын жасыру арқылы Ақтөбе облысының бірнеше тұрғындары атаулы әлеуметтік көмекті (бұдан әрі - АӘК) заңсыз алып келген, осылайша мемлекетке шамамен 3,5 миллион теңгеден астам шығын келтірді.

Облыстық жұмыспен қамтуды үйлестіру және әлеуметтік бағдарламалар басқармасының табысы аз отбасыларға мониторинг жүргізу және әлеуметтік көмек көрсету бөлімінің басшысы Ақсұлу Жұбаназарова Ақтөбе облысы тұрғындарының әлеуметтік сала қызметкерлерін алдаудың өрескел фактілері туралы айтып берді. Оның айтуынша, АӘК тағайындау кезінде табысты жасыру және уақытша тұрғылықты жері бойынша тіркеу арқылы әлеуметтік көмекті қайта алу - ең көп таралған бұзушылық.

«Ағымдағы жылғы сәуір айының басында өңір тұрғыны Алға аудандық жұмыспен қамту және әлеуметтік бағдарламалар бөліміне АӘК алуға құжаттарын тапсырды. Оған ай сайын 131235 теңге төлем есебінен жалпы сомасы 1574820 теңге әлеуметтік көмек тағайындалды. Сәуірдің 23-і күні осы азаматаша Ақтөбе қаласына уақытша тіркеуге тұрып, АӘК алуға қайтадан құжат тапсырған», – деді Ақсұлу Жұбаназарова.

Еңбек министрлігінің артық төленген төлемдерді анықтау жөніндегі нұсқауын орындау үшін Ақтөбе облысының жұмыспен қамтуды үйлестіру және әлеуметтік бағдарламалар басқармасы Алға тұрғынына жалпы сомасы 1600548 теңге АӘК қайта тағайындалғанын анықтады. Бұл азаматша үш ай ішінде алдау арқылы 400137 теңге алып үлгерген, аталған ақша қазіргі уақытта бюджетке қайтарылды, ал екінші шешім бойынша тағайындалған төлем толығымен тоқтатылды.

Осыған ұқсас факт Байғанин ауданында да орын алған. Ағымдағы жылдың сәуір айында көпбалалы үйдің отағасы табысын ең төменгі жалақы мөлшерінде көрсетіп, әлеуметтік көмек алуға құжаттар тапсырған.

Мемлекеттік кірістер департаменті мен Ақтөбе облысының жұмыспен қамтуды үйлестіру және әлеуметтік бағдарламалар басқармасының бірлескен жұмысының нәтижесінде, аталған азамат жеке кәсіпкерліктен тапқан 13944480 теңге сомасындағы табысын жасырғаны анықталды. Отбасы кірісінің артуына байланысты АӘК қайта есептеліп, үш айда төленген 315360 теңге көлеміндегі әлеуметтік көмек бюджетке толығымен қайтарылды.

Жұбаназарованың мәліметінше, тұрмысын заңсыз жолмен түзетуді қалаған өңір тұрғындары мемлекетке 3,5 млн теңге шығын келтірген.

Еске сала кетейік, республика бойынша 21 мыңға жуық отбасы тек табысы аз және аз қамтылған мұқтаж отбасыларға ғана берілетін атаулы әлеуметтік көмекті заңсыз алу мақсатында өздерінің нақты кірістерін жасырған.

Осыған байланысты Министрлік әкімдіктермен бірлесіп, «Мемлекеттік атаулы әлеуметтік көмек туралы» ҚР Заңын бұза отырып, заңсыз тағайындалған төлемдерді қайта қарау және бұзушылықтардың алдын-алу бойынша анықталған әрбір анықталған фактімен жеке-жеке жұмыс жүргізуде.

Ағымдағы жылғы 15 тамыздағы жағдай бойынша атаулы әлеуметтік көмекпен 1,8 млн қазақстандық қамтылған. Жәрдемақы алушылардың ең көп саны Түркістан облысында – 498,7 мың адам, Алматы облысында – 225,4 мың адам, Шымкент қаласында – 216,3 мың адам тұрады. Ағымдағы жылдың 1 тамызындағы жағдай бойынша 103 млрд теңге көлемінде АӘК төленді. Бір отбасына төлемнің орташа мөлшері айына 86 мың теңгені құрап отыр.

enbek.gov.kz

Хабарламаларға жазылу