Жаңалықтарды Telegram арнамыздан оқыңыз!2018 жылдың 1 қыркүйегінен бастап ойын-сауықтық «Tamasha TV» телеарнасының тұсауы кесіледі.
Жаңа телеарна OtauTV және iDTV пакеттерінде HD форматында қолжетімді болмақ. Сондай-ақ, алдағы уақытта басқа да кабельдік операторларда SD форматта таратылатын болады. Бүгінгі күні спутниктік ОТАУ ТВ операторының аудиториясы шамамен 900 000-ға жуық болса, ID TV-ді 400 мыңнан астам абонент қолданады.
«Tamasha TV» телеарнасының эфирі «Қазақстан» телерадиокорпорациясының ішкі телеөнімімен толықтырылатын болады. Айта кетсек, арна «Әзіл әлемі» «Жайдарман», « Хаха-шоу», «Әзіл Man», «Көңілді тапқырлар алаңы», «Қызық екен», комедиялық телехикаялар және т.б қызықты жобаларды ұсынбақ.
Сондай-ақ, жаңа телеарнаның ашылуымен телерадиокорпорация мұрағатында жылдар бойы сақталған, кезінде көрерменнің көңілінен шыққан танымал ойын-сауықтық бағдарламалар эфирге қайтадан оралатын болады. Жаңа телеарна отандық телевизия әлемінде ойын-сауықтық, әзіл-сықақ жанрындағы бағдарламаларды кеңейтуді көздейді. Телерадиокорпорация алдын ала теленарықты зерттей келе, ойын-сауықтық контенттің көрермен арасында үлкен қызығушылық пен сұранысқа ие екенін ескерді.
«Tamasha TV» телеарнасының орташа тәуліктік хабар тарату уақыты 22 сағатты құрайтын болады. Жаңа арнаның директоры болып Есен Елеукен тағайындалды.
