Жаңалықтарды Telegram арнамыздан оқыңыз!Үкімет жанындағы онамастикалық комиссияның отырысында еліміздің біртуар тұлғаларына көше аттары берілді. Бұл туралы журналист Нұртөре Жүсіп өзінің Фейсбуктегі парақшасында мәлімдеді.
«Астанадағы Орынбор даңғылы – Мәңгілік ел даңғылы, №36-шы және Еңбекшілер көшесі біріктіріліп – Әлихан Бөкейхан даңғылы деп аталатын болды», - деп жазды Н.Жүсіп.
Оның айтуынша, Бұқар Жырауға, Нияз биге, Кенен Әзірбаевқа, Бейімбет Майлинге, Ханшайым Сүйінбикеге, Темірбек Жүргеновке, Сұлтанбек Қожановқа, Рабиға Есімжановаға, Сәкен Жүнісовке, Қайым Мұхамедхановқа бір-бір жаңа көше бұйырды.
Сондай-ақ, еліміздегі 91 теміржол станциясының атауы қазақшаланды. Үкімет жанындағы ономастика комиссиясының кезекті отырысында Қазақстандағы бірқатар теміржол станцияларының атауы ұлттық сипатына оралды.
«Алма–Ата–1, Алма–Ата–2–нің орнына Алматы–1, Алматы–2 деп, Кустанай – Қостанай, Осакаровка – Сарыбел, Карьерная – Ортас, Семипалатинск – Семей, Талды–Курган – Талдықорған, Чимкент – Шымкент, Сары–агач – Сарыағаш, Джетісай – Жетісай, Джамбул – Тараз, Саксаульская – Сексеуіл, Казалинск – Қазалы, Джусалы – Жосалы, Тюратам – Төретам, Хор–хут – Қорқыт, Джалагаш – Жалағаш, Кзыл–Орда – Қызылорда, Соло–тобе – Сұлутөбе, Чиили – Шиелі, Тюмень–арык – Төменарық үлгісінде қайта жаңартылды. Жалпы станциялар бойынша 91 атау өзгертілді», – деп жазады журналист.
