Жаңалықтарды Telegram арнамыздан оқыңыз!Облыс әкімінің өкімімен бұл лауазымға Әлназарова Ақмарал Шәріпбайқызы тағайындалды.
А.Әлназарова 1971 жылы Қызылорда қаласында дүниеге келген. 1994 жылы Алматы мемлекеттік медицина институтын - дәрігер-педиатр, 2006 жылы Қорқыт ата атындағы Қызылорда мемлекеттік университетін экономист мамандықтары бойынша бітірген. Медицина ғылымдарының докторы.
Еңбек жолын 1994 жылы Қызылорда қалалық балалар ауруханасының қабылдау бөлімінің дәрігері ретінде бастаған. 2001-2004 жылдары – Қызылорда облыстық балалар ауруханасының бас дәрігері, Қызылорда облыстық денсаулық сақтау басқармасы бастығының орынбасары, басқарма бастығы, 2005-2013 жылдары – Қазақстан Республикасы Денсаулық сақтау министрлігінің Медициналық қызмет көрсету саласындағы бақылау комитетінің Қызылорда облыстық басқармасының бастығы, Қызылорда медициналық колледжінің директоры, 2013-2014 жылдары – Қызылорда облысы әкімінің орынбасары лауазымдарында қызмет атқарған. 2014 жылдан бастап осы кезге дейін Қызылорда облыстық мәслихатының хатшысы қызметін атқарып келді.
Соңғы үш жылда аймақтың әлеуметтік саласын дамытуға қыруар қаржы жұмсалып, жаңа жобалар жүзеге асырылуда. Соның ішінде денсаулық сақтау саласының нысандары жаңартылып, материалдық-техникалық базасы күшейтілуде.
Бүйрек ауыстыру, жүреккке ота жасау сияқты оталарды жергілікті дәрігерлер жасауға жағдай жасалды. Ана мен бала денсаулығы да үнемі бақылауда. Халыққа көрсетілетін қызметтің 83 пайызы медициналық қызметке байланысты. Сондықтан, медициналық қызметтің сапасын арттыру мәселесі күн тәртібінен түскен емес. Осы жұмыстарды жалғастыру енді Ақмарал Әлназароваға жүктеліп отыр, деп хабарлайды облыс әкімдігінің баспасөз қызметі.
