Жаңалықтарды Telegram арнамыздан оқыңыз!Батыс Қазақстан облысында 776 мың теңге заңсыз сыйақы алған аудандық бас сәулетшіні қызметінен босату ұсынылды. Әдеп кеңесінде Жәнібек ауданы құрылыс бөлімінің басшысы Манарбек Әдиевтің тәртіптік ісі қаралды. Ол бұған дейін тәртіптік жазаға тартылған. Әдеп кеңесінің мүшелері «шенеунік қызметінен қуылсын» деген шешім шығарып, аудан әкіміне ұсыныс жолдады. Ал Ақжайық аудандық жұмыспен қамту бөлімінің басшысы Фархад Уахитов инватакси қызметін дұрыс ұйымдастырмаған. Келісімшарт талаптарын дұрыс орындамаған. Заң бойынша шенеунікке «қызметіне толық сәйкес еместігі» туралы ескерту беру ұсынылды.
Манарбек Әдиев, Жәнібек аудандық сәулет, қала құрылысы және құрылыс бөлімінің басшысы:
Мерекелерге сай мекеме қызметкерлеріне және өзіме сыйақы тағайындалған болатын. Өзіме қатысты тәртіптік жазаның бар екенін білмей қалдым. Қателікке бойұсындық. Төленген сыйақы бюджетке қайтарылды.
Мұрат Байсалов, ҚР Мемлекеттік қызмет істері агенттігі облыстық департаментінің басшысы:
Өзінің тәртіптік жауапкершілікке тартылғанын біле тұра, өзіне сыйақы мәселесін қарастырған. Ол өз кезегінде мемлекеттік қызметшілерге кір келтіретін теріс қылық болып табылады. Сол себепті біз аудан әкіміне қызметінен босату туралы ұсыныс жолдадық.
Ардақ Мұратқызы
